ماڭعىستاۋ وبلىسىندا ەلباسىنىڭ «100 ناقتى قادام» ۇلت جوسپارىنىڭ ءجۇزىنشى قادامىن ورىنداۋ بارىسىندا قۇقىق قورعاۋ قىزمەتتەرى ورتالىعىنىڭ رەسمي اشىلۋى سالتاناتتى تۇردە ءوتتى.
ازاماتتاردىڭ مەملەكەتتىك جانە قۇقىقتىق ورگاندارعا دەگەن سەنىم دەڭگەيىن ارتتىرۋ, اتقارۋشى جانە قۇقىق قورعاۋ ورگاندارى مەن حالىقتىڭ اراسىنداعى اشىقتىقتى قامتاماسىز ەتۋ ماقساتىنداعى ورتالىق قۇقىقتىق قىزمەتتى ءبىر جەرگە بىرىكتىرىپ, ازاماتتاردىڭ وتىنىشتەرىن قاراۋ جۇمىسىن جاڭا ءارى ساپالى دەڭگەيگە كوتەرۋدى كوزدەيدى جانە جالپى اۋماعى 680 شارشى مەتر قۇرايتىن عيمارات ء«بىر تەرەزە» قاعيداتى بويىنشا ارنايى ورىندارمەن جانە قاجەتتى ماتەريالدىق-تەحنيكالىق قۇرالدارمەن قامتاماسىز ەتىلگەن.
- ەل تاۋەلسىزدىگىن العان كەزەڭنەن باستاپ مەملەكەتىمىزدە زاڭدىلىقتار مەن قوعامدىق ءتارتىپتىڭ جاعدايىن, كونستيتۋتسيا مەن زاڭداردى مۇلتىكسىز ساقتاۋدى ەلباسى حالقىمىزدىڭ الدىنا باستى ماقسات ەتىپ قويدى. قوعامنىڭ بىرقالىپتى ءومىر ءسۇرۋى, ەلدەگى ءتارتىپ پەن تىنىشتىقتىڭ ورناۋى ەڭ اۋەلى قۇقىق قورعاۋ ورگاندارى سالاسىنىڭ قىزمەتىنە تىكەلەي بايلانىستى. حالىقتىڭ قۇقىق قورعاۋ ورگاندارىنا دەگەن سەنىمىن ارتتىرىپ, ەلباسى قويعان ماقساتتارعا جەتۋ ءۇشىن بىرقاتار جۇمىستار اتقارىلىپ كەلەدى. تاۋەلسىزدىك كۇنىنە وراي ءبىزدىڭ وبلىسىمىزدا قۇقىق قورعاۋ قىزمەتتەرى ورتالىعى قۇرىلىپ, 12 مەكەمەنىڭ ماماندارى تۇرعىندارعا اقىسىز تۇردە قۇقىقتىق قىزمەت كورسەتەتىن بولادى. بۇل قىزمەتكەرلەر ءسىز تاراپىنان قويىلعان سۇراقتار مەن بارلىق ماسەلەلەردى زاڭ اياسىندا شەشۋگە جانە كومەك كورسەتۋگە ارقاشاندا دايىن», دەدى ماڭعىستاۋ وبلىسىنىڭ اكىمىڭ ە.توعجانوۆ.
قۇقىقتىق ماسەلەلەر بويىنشا تۇرعىنداردى قابىلداۋدى تاجىريبەلى پروكۋرورلار جۇرگىزەدى. ازاماتتاردىڭ وتىنىشتەرىن قاراۋدى ءتيىمدى ۇيىمداستىرۋ ءۇشىن 8 مەملەكەتتىك ورگاننىڭ قىزمەتكەرلەرى تارتىلعان, ونىڭ ىشىندە: وبلىس اكىمدىگى, جەرگىلىكتى پوليتسيا قىزمەتى, قىلمىستىق-اتقارۋ جۇيەسى, ەڭبەك باسقارماسى, مەملەكەتتىك كىرىستەر دەپارتامەنتىنىڭ جانە ت.ب., سونداي-اق ادۆوكاتتار, نوتاريۋستار, مەدياتورلار جانە پسيحولوگتار.
گۇلايىم شىنتەمىرقىزى, «ەگەمەن قازاقستان».
ماڭعىستاۋ وبلىسى